पुणे : सर्वत्र दिवाळीची धामधूम सुरू आहे. सामान्यांप्रमाणे विशेष मुलांनाही दिवाळी आनंदाने साजरी करता यावी, यासाठी महावीर फूड बँकेच्या वतीने टिंगरेनगर येथील सी. आर. रंगनाथन कर्णबधिर विद्यालयातील विशेष मुलांना खाऊ व मिठाईचे वाटप करण्यात आले. त्यासह ममत्व आणि संपर्क संस्थेतील मुलांनाही मिठाईचे वाटप करण्यात आले. साधारणपणे ५०० मुलांना मिठाई वाटण्यात आली. महावीर फूड बँकेचे अध्यक्ष विजयकुमार मर्लेचा यांच्या पुढाकारातून गेली १४ वर्षे हा उपक्रम सुरू आहे.
कार्यक्रमाच्या अध्यक्षस्थानी नगरसेवक प्रवीण चोरबेले होते. या वेळी स्वयंम सिद्धा ट्रस्टच्या प्रमुख पुष्पा कटारिया, पुना डाळ आणि बेसन मिलचे संजय कटारिया, राजश्री पारेख, संगीता छाजेड उपस्थित होत्या. नेमीचंद संघवी यांच्या स्मृतीनिमित्त आशा संघवी यांनी, तर शांतीलाल छाजेड यांच्या पुण्यतिथीनिमित्त प्रमोद छाजेड यांनी फराळ दिला. रंगनाथन शाळेचे वसंतराव पाटोळे यांनी सर्वांचे स्वागत करून मुलांना दिलेल्या मिठाईबद्दल आभार मानले. या मुलांनी काढलेली चित्रे सर्वांना भेट देण्यात आली.